Aurtengo aldiak dedikazio berezi bat du. Urteetan klasikoen rallyko antolatzailea izan den Maykel del Cid 2015 amaieran hil zen, eta rallya bere oroimenezkoa izango da.
Antolatzaileen esanetan, 30 taldetik gora batuko da erakustazokan. Ferrari, Porsche, Lancia, BMW, Audi, Ford Scort… dira etorriko diren marketako batzuk. Jatorria ere askotarikoa da: Nazioartetik (Frantzia, Italia, Andorra…), Estatutik (Kanariar irlak, Valentzia, Katalunia, Madril…) eta Euskal Herriko hainbat herritatik etorriko dira.
Barikuan, 17:00etatik aurrera, erakustazokan batuko dira. Hantxe egongo dira lau orduz, 21:00 arte. Ordu horretan irtengo da lehen parte-hartzailea.
Otxandiotik igaroko dira
Lasterketa hasi arte ibilbidea sekretua izaten den arren, antolatzaileek ibilbidearen barruko herri batzuk aurreratu dituzte. Esaterako, zapatuan, 16:00etatik aurrera, Otxandiotik Eskoriatzara joango dira. Barikuan, aldiz, Muniketatik eta Bizkaiko Balkoitik ibiliko dira. Baita Lekeitio ingurutik ere.