Urtebetean kontzerturik eskaini barik egon ostean, Igual y diferente, una mirada distinta disko berriko hainbat kanta aurkeztuko ditu Doctor Deseok, Durangon. Apirilaren 9an Plateruenean eskainiko duten kontzerturako “aperitifa” izango da Hitzeko emanaldi akustikoa, liburu-dendako arduradunen berbetan, eta Durangoko Kafe Antzokiko kontzerturako sarrerak eskuratu ahalko dira bertan.
Arduradunek azpimarratu dutenez, Hitz liburu-denda izango da Doctor Deseoren disko berria salgai ipiniko duen Euskal Herriko lehenengo saltokia, izan ere, emanaldiaren egunean, apirilaren 7an, ekingo baitiote salmentari.
Taldearen hamabosgarren diskoa da bederatzi kantako Igual y diferente, una mirada distinta, eta bi euskarritan kaleratu dute; CDa eta DVD bat biltzen dituen liburu bat prestatu dute “zaleentzat opari”: kanta berriez gain, Bilboko eta Lekeitioko zuzenekoetan grabatutako hainbat abesti biltzen ditu.