Apirilaren 10ean Euskadiko Judo Txapelketa jokatuko dute —oraindik tokia erabaki barik dago— eta kadete mailan Durango Judo Taldeak sei ordezkari izango ditu gutxienez. Bost judolarik asteburuan Etxebarrin jokatu den Bizkaiko txapelketan lortu dute sailkapena eta beste bat Euskadiko federazioak gonbidatu du iaz domina irabazi zuelako. Beraz, sei judolarik segurtatuta dute Euskadikoan parte hartzea, baina gehiago izan daitezke, oraindik federazioak ez duelako jakinarazi Bizkaiko selekzioa nortzuk osatuko duten.
Etxebarriko txapelketan zortzi domina irabazi zituzten Durango Judo Taldeko kadeteek: Seyba Konare (urrea), Mikel Carretas (urrea), Daniel Grigore (zilarra), Ana Diez (zilarra), Eneko Diez (zilarra), Jon Mikel Beltran (brontzea), Eneko Carballo (brontzea), eta Iker Perez (brontzea).