"Eztabaida hau proposatzea nahi genuen, baina ez dugu aukerarik izan", esan dute zinegotziek prentsaurrekoan. Memoriaren Plazaren aurkezpenean Aitziber Irigorasek adierazi zuen bozeramaileen batzordean aho batez onartu zutela ekimena, baina kazetariek galdetu ostean, Dani Maeztuk esan du ez zela bozkatu, "formatu itxia" izan zela eta horren berri eman zela soilik.
Bestalde, memoria historikoaren zein giza eskubideen urraketaren arloan lan egiten duten eragileak herrian badaudela gogoratu dute, eta horiek lanketara ez gonbidatzea ere kritikatu dute.
Mapa, "kaxoi batean"
Memoriaren Plaza Eusko Jaurlaritzako Gogora institutuak antolatu du, eta horrek berak Memoriaren Mapa aurkeztu zuen azaroan, gero udalek herrika osatu ahal izateko. Bada, lan hori "udaleko kaxoi batean gordeta" dagoela esan du EH Bilduk, eta horregatik, batzorde berezi bat sortzea proposatu du. Herriko eragileen agerraldiak eta herritarren lekukotzak jasoko lituzkete bertan.
