Epaimahaia askotariko sormen eremuetan dabiltzan Durangaldeko hiru lagunek osatu dute: Irati Eguren ilustratzaile durangarrak, Arkaitz Callado Itsua musikari durangarrak eta Lehior Elorriaga argazkilari zaldibartarrak. Sari banaketan ere protagonismo berezia izango dute. Bakoitzak sari bat banatuko du eta, horregaz batera, beren arloko sormen lan bat emango diote irabazleari.
Honakoak dira banatuko diren hiru sariak: 14-16 urte arteko ipuinik onenak tableta eta liburu sorta jasoko du; gainerako biek (17 urtetik gora Durangaldeko ipuinik onena eta Twitter bidezkoa) 100na euro eta liburu sortak jasoko dituzte. Liburuak Hitz, Urrike eta Arteka liburu dendek emandakoak dira.
Platerueneko sari banaketa ekitaldia irekia izango da, eta ekitaldi ostean luntxa egongo da bertaratzen diren lagun guztientzat.
