Aurten solasaldien guneak nobedade bat dauka. Horrela gura duten idazleek atril bat izango dute ondoan, solasaldia hasi baino lehen eta amaitu aurretik, aurkezten duten liburuaren pasarteak irakurtzeko: “Gero eta gehiago dira formatu hibridoak egitera animatzen direnak. Testuak irakurrita, solasaldiei beste freskotasun bat eman dakiekela uste dugu. Ahotsenera batzen den ikus-entzuleak ez du liburua ezagutzen, eta hari buruzko azalpenez gainera liburu horretako testuren bat ere helarazten bazaio, aurkezpen beteagoak izan daitezkeela uste dugu”, dio Ahotseneako koordinatzaile Lutxo Egiak.
Gainera, Azokako hiru egunetan, irakurketa horiek LeKord taldeko lagunek gauzatuko dituzte. Ane Artetxe arpa-joleak lagunduta, Amaia Irazabalek eta Amaia Ruizek testuen irakurketa dramatizatuak egingo dituzte zapatuan, domekan eta astelehenean. Gainerako egun bietan ere atrila hantxe egongo da, gura duten sortzaileen eskura.
Ikuskizun musiko-literarioa
Ahotseneak ere bat egin gura du Durango Azokaren 50. urteurrenagaz, eta hori ospatzeko ekitaldi bat antolatu dute. Horrela, martitzenean, Azokaren azken egunean, LeKord taldeak musika eta literatura uztartzen dituen ikuskizuna eskainiko du Ahotsenean 17.30etik 18.30 ingurura.