Urtero legez, kadete eta gazte mailetako pilotariei zuzendutako txapelketa da; maila bakoitzean, 16 pilotarik lau multzotan banatuta neurtuko dituzte indarrak. Durangaldeko lau pilotari daude tartean: gazte mailan, Elorrioko pilota taldeko Gontzal Azkarraga eta Paul Sagasta, eta Zaldibarko taldeko Jon Iparragirre ari dira. Hirurek atzo arratsaldean jokatu zituzten txapelketako partiduak Laukizko pilotalekuan. Kadete mailan, berriz, Durangoko pilota taldean dabilen Aingeru Olaguenagak parte hartuko du.
Kanporaketa bidezko sistema darabilen txapelketa da: irabazleak aurrera egingo du, eta galtzailea kanporatuta geratuko da. Sei jardunaldietako bat, azken aurrekoa, Iurretako pilotalekuan jokatuko dute, irailaren 22an. Olaguenagak, multzoburua denez, Iurretan jokatuko du txapelketako lehenengo partidua.