Jose Mari Agirre ‘Peter’-en oroimenezko pilota txapelketaren barruan hiru final jokatuko dituzte. Lehenengo final biak lau t’erdian dira: kadeteetan Sagasta eta Olaguenaga neurtuko dira, eta, promesetan Diez eta Zubikarai. Nagusien mailako finala binaka jokatuko dute: Aurtenetxe eta Olalde Elordi eta Zabalaren kontra lehiatuko dira. Finalak ikusteko ez dago ordaindu beharrik; sarrera doakoa da.
Zesta txapelketako finalerdiak
Durangoko Ezkurdi Jai Alai pilotalekuak zestako partiduak ere hartuko ditu asteburuan. Hain zuzen, zapatuan, 18:00etan, Euskal Astea XIV. Zesta Txapelketako finalerdiak jokatuko dituzte. Lehenengo partiduan Retolaza eta Aitzol berritxuarrak Lander eta Andonegi mutrikuarren kontra lehiatuko dira; bigarren finalerdian Goenaga eta Elkoro mutrikuarrek Gandiaga eta Mandiola izango dituzte kontrario. Irabazleek ekainaren 13an jokatuko dute finala.