Borroka arteen erreferente dira biak Durangaldean, 50 urte eginak dituzte, lagunak dira, eta lehiaketa ofizialetatik erretiratuta daude. Beraz, zelan sortu da borrokaldia? Biek komunean duten Christian Barreira durangarrak du errua: “Orain bost hilabete, elkarrekin geunden egun batean, bien arteko borrokaldi bat ikustea itzela izango litzatekeela esan nien, eta, ustekabean, ‘zergatik ez?’, esan zuten”. Harrezkero buru-belarri ibili da antolaketa lanetan Barreira. Izar bien arteko borrokaldiak badu beste berezitasun bat: jendaurrean sekula elkarren kontra borrokatu gabeak dira: “Orain 20 urte entrenamenduetan elkarren kontra ibiltzen ziren, baina jendaurreko borrokaldi batean sekula ere ez”. Kaiola batean eta kickboxing modalitatean neurtuko dituzte indarrak, minutu bi eta erdiko bi asaltotan.
Jaialdia 18:00etan hasiko da, eta borrokaldi nagusiaren aurretik beste hainbat izango dira: K1 modalitatean, Aritz Abui-Gustavo Joao eta Unai Fernández-Wesley Berriozabal neurtuko dira, eta, MMA (Mixed Martial Arts) mailan, lau borrokalariren arteko kanporaketak egongo dira ikusgai: Giorgi Bazanov, Ángel Martínez (Abadiñon bizi da), Antxon Arias (Zornotza) eta Ignacio Capella.
Sarrerak salgai
Jaialdirako sarrerak honako salmenta gune hauetan erosi daitezke 12 euroan: Durangoko Sweet&Vicious, El Altar de Santa Apolonia, Karreto’s eta Kirol Errotan, Traña-Matienako Tipi Tapak tabernan eta Ermuko Tukos Fitness-en. Orain astebete hasi zuten sarreren salmenta, eta dagoeneko erdiak baino gehiago saldu dituzte.