Arandoño elkarteak gonbidatuta, hainbat aldiz jo izan du Jose Luis Echechipia organistak Durangon. Xabier Arana Arandoño elkarteko kideak kontzertuaren aurkezpenean azpimarratu duenez, baina, “lasaiago” jardungo da oraingoan. Askotariko errepertorioa eskainiko du organistak, eta joko dituen kantuen inguruko zein organistaren jardunari buruzko azalpenak ere emango ditu. Organo kontzertuen ziklo honetan ohikoa den bezala, elizako aldarean ipiniko duten pantailatik emango dituzte organistaren irudiak, jotzen dabilen bitartean.
François Espinasse
Hamasei urte daramatza Durangoko Arandoño elkarteak organo kontzertuen ziklo hau antolatzen, eta maila altuko organistak gonbidatu izan dituzte antolatu dituzten 50 emanaldietan parte hartzera. Ildo horretan, abenduaren 19ko emanaldia ere azpimarratu du Xabier Aranak asteon egindako agerraldian. Izan ere, Parisko Saint Séverin elizako Versaillesko errege kaperako organista da abenduaren 19an, Durangon, joko duen François Espinasse.