Durangoko Ibaizabal ikastolako Haur Hezkuntzako lehenengo mailako 25 ikasleek idatzi, prestatu eta antzezturiko bost lan eskainiko dituzte, asteon, Durangoko Plateruenean. Berbaro elkarteak umeei zuzenduta kudeatzen duen Olgetan proiektuaren barruan eskainiko dituzte bost emanaldiak. Astelehenetik barikura, bi eta bost urte arteko ikusleengan eta euren familiengan pentsatutako antzezlan bana eskainiko dute, 17:30ean hasita.
Mireia Delgado irakasleak azaldu duenez, lehenengo, gelan prestaturiko ikuskizunak beste ikastola batzuetan eskaintzen hasi ziren. Iaz egin zuten lehenengoz, emanaldi zabala, Plateruenean. "Hain lan handia eginda, ikuskizun osoak sortu dituztenez, herrira zabaltzeko bide egokia dela uste dugu".
Bidaiak –bat ilargirainokoa–, misteoriozko istorioak zein naturari buruzkoak, jolasak... Askotariko gaiei buruzkoak dira Plateruenean eskainiko dituzten bost ikuskizunak, Ilargiaren zati bat, Antzinako taupadak, Jolastokitik espaziora, Irakurriz amestuz eta Urtaroei adi, txantxangorria gidari! izenburukoak. "Bihotzetan sartu ahal izateko, bihotzean sorturikoak behar dute izan istorioek”, dio Delgado irakasleak: “Emozioetan, detaileetan, gauza txikietan oinarriturikoak".
Haur Hezkuntzako ikasketetan diziplinarteko gaia dute literaturari eta antzerkiari loturikoa; hainbat ikasgaitan lantzen dute proiektua, eta datorren astean Plateruenean eskainiko dituzten ikuskizunak prestatzea da proiektu horren zatietako bat. "Hezitzaile profila lantzeko, oso inportantea da errealak diren egoerak planteatzea: benetako plaza bat eskainita, testuinguru errealean dihardute ikasleek. Bestalde, taldean egindako lana da, erronka bat daukate, eta ikuskizun osoa euren esku dago".
- OTSAILAK 17
Ilargiaren zati bat - OTSAILAK 18
Antzinako taupadak - OTSAILAK 19
Jolastokitik espaziora - OTSAILAK 20
Irakurriz amestuz - OTSAILAK 21
Urtaroei adi, txantxangorria gidari!
* Emanaldi guztiak, 17:30ean, Plateruenean