Datorren astean Landako kiroldegian dauden padel pista bietako zoruak aldatzen hasiko dira. Padel pistak orain zortzi urte egin ziren, eta harrezkero, apurka-apurka, belarra soiltzen eta harea bistaratzen joan da. Orain, belar artifizialeko zoru berria ipiniko dute, eta beroari zein bestelako baldintza klimatologikoei aurre egiteko prestatuta egongo da.
Durango Kirolak-eko presidentea den Mari Jose Balierren berbetan, “kontuan hartu behar da jende askok erabiltzen dituela padel pistak; horregatik, ezinbesteko deritzogu azpiegitura behar den moduan egoteari”. Zoru berria jartzeak 10.208 euroko kostua izango duela jakinarazi dute.