Bilboko Arte Ederren Museoak Regoyos margolariari eskainitako erakusketan Durango eta inguruetako bista ederrak bildu dituzte.
Asturiarra izan arren euskal pinturagintza modernoaren erreferente bat da Darío de Regoyos (Ribadesella, 1857 - Bartzelona, 1913). Belgikan inpresionisten eta postinpresionisten eskutik ikasi eta Europan eta Espainian zehar bidaiatu ostean, Euskal Herrian aurkitu zuen paisaia begikoena. Herri ugaritan bizitakoa, hara eta hona emaztea eta seme-alabak lagun, inpresionismoaren abenturari ekin zion.
Besteak beste 1897 eta 1907a bitartean hurbildu zen Durangaldera, sarritan. 1905ean Durangoko Artekalen bizi izan zen, bere emaztea Arrasateko psikiatrikoan zen bitartean; 1907an, ostera, orduko Olmedal kalean –egungo Ermodon-, Iurretan estudio bat zuelarik. Hamarnaka lan egin zituen estantzia haietan, hala nola, Urkiola, Arrazola, Elorrio zein Durangoko bista ezberdinak, pintzelkada azkar eta koloretsuaz, momentuko argia, eguratsaren une-uneko inpresioa, harrapatu guran.
Horietako batzuk daude Bilboko erakusketa handian. Alde batetik, Mugarra haitz monumentalaren ikuspegi ederra, Anbotoko mendizerraren bi bista –bata Durangotik eta bestea Abadiñotik-, eta Durango hiribilduko paisaia bat, atzean Untzillaitz eta Eskubaratz direla. Bestetik, Andra Mariko elizpeko merkatuaren koadro bikaina –baita 1897an gauzatutako Pais Basco izeneko grabatu bildumarako egindako elizpearen barne bista-, Kurutziaga, Pinondo zein Iurretako eszena bi –bata herriarena, beste bat ziur aski Arriaundi inguruko erreka izkina batena- ere presente dira. Regoyos bera Durangoko kale batean ume eta helduez inguratuta agertzen den argazki polita badago baita.
Faltan sumatzen dira Artekalen egindako bi koadro eder –bata goizez, bestea arratsaldez-, hondoan Santa Anako arkua eta Untzillaitz mendiak direlarik. Nolanahi ere, euskal pintore handienetako batek behar zuen erakusketaren aurrean gaude duda barik, eta gurean gauzatutako lanek badute merezitako lekua.