San Agustin kulturgunetik Durangoko kaleetara aterako dituzte emanaldiak.
San Agustin kulturguneak irailera arte ateak ixten dituenean, bertako edukiak kalera ateratzeko pentsatu zuten Uda Kalean Bizi programazioa duela 14 urte.
Zortzi emanaldi izango dira aurten: musika, zirku edota antzerki ikuskizunak. Udaletxeko edo Ezkurdiko plaza, Kurutzesantu Museoa edo Andra Mariko elizpea hartuko ditu datozen asteetan kulturak, eta aurten, espazio berri bat estreinatuko dute: musika eskolako lorategia.
Arantza Arrazola San Agustin kulturguneko kudeatzaileak, Jon Kepa Garro zinegotziak, eta Khantoria taldeko Ander Berrojalbiz musikari durangarrak aurkeztu dute aurtengo programazioa.
Erdi Aroko musika
Duela bi urte Durangon estreinatu zuten Bereterretchen oinatzak eskainiko dute Khantoria hirukoteak –Ander Berrojalbiz, Maider Lopez eta Virginia Gonzalo– eta Kerstin Ansorge eta José Menéndez musikari gonbidatuek. Biolina, biola, Erdi Aroko organettoa, harpa gotikoa, edota txirula doblea izango dira, besteak beste, entzungai.
Funes Van zirku ikuskizunak zabalduko du ekainaren 28an Uda Kalean Bizi, eta beste zirku ikusizun bat ere izango da, uztailaren 13an: El negro y el flaco taldearen Charabia.
Le Petit Theatre de Pain Frantziako taldearen emanaldia eta musika eskaintza azpimarratu dituzte aurkezpenean: “kontzertu intimista” eskainiko dute, uztailaren 18an, Fran Lasuenek eta Jose Luis Canalek, eta Alemaniako Banda Beat’n Blow taldeak itxiko du programazioa, Andra Mariko kontzertuagaz.
|
|