Zortzi film labur eskainiko dituzte Plateruenean.
Topagunea Euskara Elkarteen Federazioak antolatutako Laburbira ekimenean aurkezturiko film laburren emanaldia izango da maiatzaren 2an, 19:30ean, Durangoko Plateruenean.
Ziklo horretan aurkezturiko zortzi film eskainiko dituzte Durangoko Kafe Antzokian. Denetariko estiloetako filmak izango dira: sormenezkoak, dokumentalak, fikziozkoak zein animaziozkoak, eta Koldo Almandoz edo Telmo Esnal lako ibilbide luzeko zinegileen zein sortzaile berrien film laburrak ere izango dira bilduma horretan.
Euskarazko ikus-entzunezko produkzioa ezagutzera ematea, eta herrietako kultur eskaintza aberastea dira Laburbira zirkuituaren helburu nagusiak, eta hamargarren urtez antolatu du Topagunea federazioak.