Durangoko Bartolome Ertzilla musika eskolak antolatu ditu, lau eta hamabi urtekoentzako.
Lau eta hamabi urte arteko umeentzako eskaintza dira Udaleku Musikalak, Durangoko Bartolome Ertzilla musika eskolan izango direnak. Musikaren, mugimenduaren, dantzaren, antzerkiaren eta sormenaren bitartez parte-hartzaileen gaitasun artistikoa eta emozionala garatzea dute helburu udaleku hauen antolatzaileek.
Parte hartzen duten ume batzuentzat, musikagaz duten lehenengo hartuemana izango dira Bartolome Ertzillako udaleku musikalak; instrumenturen bat jotzen dakitenei, aldiz, artearen bitartez elkarrekin komunikatzeko baliabideak eskainiko dizkiete Musika Eskolako saioak.
Lau orduko saioak egingo dituzte ekainaren 25etik uztailaren 6ra. Durangoko Montevideo kaleko musika eskolan bertan eman daiteke izena, edo www.durangomusika.net helbidean (125 euro). Ekainaren 15era arte eman dago horretarako epea.
Saxo kontzertua
Musika eskolako saxo ikasleek kontzertua eskainiko dute, maiatzaren 21ean, 17:00etan, eskolako areto nagusian. Kantu ezagunen bertsioak eskainiko dituzte, eta bandaren eta orkestraren laguntzarekin ere arituko dira.