Uztailaren 23an, 22:00etan, Andra Mariko elizpean eskainiko du Indonesiako hiriburuko Krida taldeak dantza emanaldia
Durangoko Kriskitin dantza taldeak gonbidatuta dator Jakartako unibertsitateko taldea, eta Uda Kalean Bizi jaialdiaren barruan eskainiko du Indonesiako tradizioko dantza emanaldia; uztailaren 23an, Andra Marian da hitzordua.
Azken urteetan legez, Portugaleteko Nazioarteko Folklore Jaialdiaren laguntzagaz hitzartutakoa da uztaileko Durangoko emanaldia; aurreko egun bietan Berrizen izango direnak legez.
![\"\"](\"/fc_imagenes/indonesia1.jpg\")
Indonesiako Yakarta hiriburukoa da uztailaren 23an Durangon izango den Krida dantza taldea: “Indonesia osatzen duten 14.000 irla eta irlatxoren ispilu, adierazle” ei da Krida taldea.
Dantza lako adierazpen artistikoak, “indar ikusezinekin”, espiritualekin, harremanetan jartzeko bide legez ulertzen dituzte han.
Musikari dagokienez, metalak eta gong txikiak uztartzen dituzte Krida taldekoek euren emanaldietan, eta Andra Mariko emanaldian ere izango dira entzungai.
Uztailaren 23ko saioan, Durangoko Kriskitin dantza taldeak ere hartuko du parte. Euskal dantzak eta musikak plazaratzeko helburuz, orain hamaika urtetik antolatu du 1987an sortu zen Kriskitin taldeak Nazioarteko Foklore Jaialdia, besteak beste, “kulturartekotasuna lantzeko” helburuagaz jaio baitzen.
Dantzaren eta musikaren bitartez, beste kultura batzuk ezagutzeko aukera eduki dute durangarrek zein bisitariek azken urteetan Udako Folklore Jaialdian.
2000. urtean lehenengoz ospatu zutenetik, uztaileko hitzordu guztietan bete da Andra Mariko elizpea dantza eta musikazalez. Beste horrenbeste desio dute antolatzaileek aurten.