Sei garaitako koadroak dira Tytgaten eskuek urteetan zehar landutakoak. Ezkurdiko Aretoaren sakonean, 60ko hamarkadan osatutako hiru lanekin hasi eta berrienak diren aretoaren sarrerako atearen ondoan amaitzen den ibilbidea proposatzen du autoreak. Berrienak, emakumea modu figuratiboan erakusten duten lanak dira, emakumea eta bere sexualitatea agertzen dutenak.
Erakusketan, baina, denetariko gai eta materialetako koadroak daude ikusgai: aluminiozko papera eta pinturarekin egindako itsasoa, edo Garaiko baserri eta landa bat osatzen duten pintura eta belarra; Eduardo Chillida eskultoreari egindako omendalditxoa jasotzen duen koadroa, "Imagina Euskadi" izenekoa, edo kapitalismoa irudikatu eta ikutu kritiko nabaria duen lana.
Parisen ikasi zuen eta 40 urte margotzen eman ditu Michel Tytgatek, orain arteko lanaren bilduma da Ezkurdiko Aretokoa.