Ingelesezko termino horrekin adierazten dute zapatuan Plaruenean izango den erakustaldia. Bertan, parte hartu nahi duten guztiendako zabalik dago izena emateko aukera, eta ez dago inongo mugarik adinari dagokionez. Izan ere, esan digutenez, gaztetxoenak izaten dira beldur gutxien izaten dutenak, eta horregatik beragatik trikimailu harrigarrienak egiten dituztenak. Aurkezpenean Gaizka antolatzaileak aitatu duenez, iazko onenen artean gehienak adin txikikoak ziren, eta ez dauka zentzu lar adin mugarik jartzeak. Hain zuzen ere, horixe izaten da halako txapelketetan gehien baloratzen dena: trikimailuak. Horien artean izaten dira, esan digutenez, ahalik eta jauzi altuenak egitea edo ranparen izkinan ahalik eta denbora gehienean oreka mantentzea.
Domekan, Landako Erakustazokan izango da profesionalen arteko lehia. Estatuko, Argentinako eta Frantziako parte-hartzaileak etorriko dira bertan paratuko duten 18 metroko ranpan erakustaldia egitera. Esandako moduan, dekorazio berezia ipiniko diote Suitzatik ekarritako ranpari, sagardo kupel itxura hartuko du-eta.
Honelako txapelketak hiri handiagoetan egitea izaten da ohikoena, esan digutenez –Madril eta Bartzelonan, esaterako– eta Durangon izateak bestelako ikutu bat emango diola uste dute. Txapelketa honetara gonbidatu egin dituzte patinatzaileak, eta 50 inguru izango dira Durangora etorriko direnak.
Sari handiak banatuko dituzte II. Plateruena Skate txapelketa honetan: 5.000 euroko saria jasoko du irabazleak. Lehen minutuan, bakoitzak egin ahal dituen trikimailurik harrigarrienak egingo ditu. Ondoren, beste tarte bat izango dute lurrera jauzi arte beste ariketa batzuk egiteko.
Ikuslegoa aho zabalik utziko dute euren abildadearekin, eta jaia bukatzeko eta ahoa ez ezik belarriak ere zabalik mantentzeko kontzertuak izango dira Plateruenean, Fu Manchu eta Valient Thorr musika taldeekin.