Sasikoak Candensaren etxean jokatuko du asteburuan. Azken aurrekoa seigarrenaren aurka. Ez da zelairik aproposena puntuak urratzeko, baina Sasikoak zulotik irten nahi badu ez du beste irtenbiderik: irabazi ala irabazi.
Halaxe uste du Aitor Olivares taldeko jokalariak ere: “Beste egoera batean berdinketa ona litzateke, baina, gauden moduan, ez digu balio. Irabaztera irtengo dugu”.
Sailkapenaren beheko aldea gori-gori dago. Azken laurak (C. Saenz, Soloarte, Sasikoa eta Muriedas) puntu biren barruan daude, eta hiru jaitsiko dira.
Bestalde, Elorrioko Buskantza ere behean dago, Nazional B Mailan (azken laugarren). Asteburuan Orioren aurka jokatuko du. Arerio gogorra da, baina bere atzetik dagoen Beti Arinek Santurtzi liderra jasoko du. Sorpresarik ezean, jaitsiera postuetatik kanpo mantenduko dira.