Bizkaiko Foru Aldundiak, Ingurune Naturala eta Nekazaritza Sustatzeko Sailaren bitartez, lau zapelatz arrunt (Buteo buteo) askatu ditu gaur Urkiolako parke naturalaren inguruan. Urkiolako aterpetxearen inguruan askatu dituzte, Aldundiak ohar batean zehaztu duenez.
Lau aleak, hiru eme eta ar bat, Bilbo, Zalla, Karrantza eta Gernikatik etorritakoak dira. Aurten bertan jaiotako hegazti gazteak dira, eta Gorlizen dagoen Bizkaiko Fauna Basatia Sendatzeko Zentroan artatu dira, ingurune naturalera itzuli aurretik.
Normalean suspertutako aleak beren jatorrian askatzen dira, betiere baldintzek horretarako aukera ematen badute. "Baina, kasu honetan, sakabanatze naturaleko fasean dauden hegazti gazteak direnez, jaio zirenez bestelako eremuetan kokatu daitezke, betiere inguruneak garapenerako ezaugarri egokiak baditu", azaldu dute.
Hamar zapelatz arrunt askatu dira 2026an
Hamar dira Aldundiak aurten askatu dituen zapelatz arruntak. Gaurko laurez gainera, beste sei itzuli zituzten ingurune naturalera aurreko esku-hartzeetan. Azken askatzea abuztuan egin zen.
Askatu aurretik, lau aleei metalezko eraztun txiki bana jarri diete hanketako batean. Prozedura horren bidez, hegaztiak banan-banan identifikatu daitezke, baten bat berriro ikusten edo suspertzeko jasotzen bada, eta informazioa eskura daiteke haren joan-etorriei, biologiari eta kontserbazioari buruz.
Zapelatz arrunta Bizkaian ibiltzen den hegazti harraparia da. Baso-eremuetan bizi da, eta espazio irekiak erabiltzen ditu elikatzeko. Batez ere ugaztun txikiak jaten ditu, baina narrastiak, anfibioak, hegaztiak eta intsektuak ere jan ditzake.
Zentroaren egoitza, Gorlizen
Bizkaiko Fauna Basatia Sendatzeko Zentroa Gorlizen dago. Lesioak, gaixotasunak edo natura-ingurunean bizirautea eragozten dieten beste inguruabar batzuk izan dituzten animalia basatiak artatzen dira bertan.
Askatu diren hegazti-espezieetako batzuk dira urubiak, belatzak, gabiraiak, apo-hontzak, hontzak, belatz handiak, miruak eta zikoinak, bai eta hegazti paseriforme ugari ere. Ugaztunak ere suspertu eta askatu dira, hala nola fokak, muxarrak eta satitsuak.
Arantza Atutxa Ingurune Naturala eta Nekazaritza Sustatzeko Saileko foru diputatua zapelatz arrunta askatzen. (Argazkia: bizkaia.eus)
Zapelatza eraztunarekin (Argazkia: bizkaia.eus)