Durangaldeko hainbat herritan azken hamar egunetan egindako ebasketengatik hainbat salaketa jarri ondoren, Ertzaintzak ikerketa bat abiarazi zuen egilea nor zen jakiteko, ohar batean azaldu duenez. Kasu guztietan, adineko pertsonak ziren biktimak, eta emakume gazte batek pertsona ezagun baten itxura hartzen zuen haiekin harremanetan jartzeko. Elkarrizketa bat hasi eta hurbil agertu ondoren, maitasunez besarkatzen zituen, eta, kontaktua aprobetxatuz, erlojuak, urrezko kateak, eraztunak edo diru-zorroak kentzen zizkien. Lapurreta egin ondoren, ibilgailu batean ihes egin zuen, eta han bere konplizea zain zeukan. Durangoko ertzain-etxearen mugapean, gutxienez antzeko 4 salaketa zenbatu dira Elorrion, Iurretan eta Durangon.
Biktimek emandako deskribapenei esker, ikerketaz arduratzen ziren agenteek susmagarriak identifikatu ahal izan zituzten, eta atzo, barikua, atxilotu zituzten Iurretako ordainlekuaren inguruan, 15:00 inguruan.
Bi gazte dira, 21 urteko gizon bat eta 20 urteko emakume bat, europarrak. "Antzeko gertakariengatik polizia-aurrekari ugari dituzte" azaldu dute. Gainera, "pertsona horien aurrekariak aztertuta, ikusten da mugikortasun geografiko handia duen talde kriminal ibiltari bateko kide izan daitezkeela", Ertzaintzaren arabera.
Behin izapideak amaituta, atxilotuak epailearen esku utzi dituzte gaur goizean bertan.