Mallabiko pilotalekuan Kickboxing Gaua antolatu zuten joan zen barikuan. Euskadiko federazioak ekimen hori baliatu zuen denboraldiko sari banaketa egiteko. Mailaz maila eta modalitatez modalitate, urteko kirolari onenak sari zituzten eta eskualdeko hainbat daude tartean.
Indar Xsport klubeko Sune Larrea elorriarrak ranking orokorreko kirolari onenaren saria jaso zuen bere mailan. Mikel Lopez Abalanzabalegik hiru garaikur jaso zituen bere adin tartean: ranking orokorreko kirolari onenarena, 24/25 denboraldiko txapeldunarena eta Euskadiko kickboxing txapelketako kirolari onenarena. Horrez gainera, Indar Xsportek hiru sari jaso zituen klub moduan: Euskadiko Basque Country ranking orokorreko klub txapeldunarena, Basque Country ranking denboraldiko txapeldunarena eta Euskadiko Kickboxing txapelketako klub onenarena.
Mallabiko galari dagokionez, Euskadiko eta Portugalgo selekzioen arteko borrokaldi nagusian, Abadiñoko Fexmack klubeko Ilias Rebroub-ek K.O. bidez irabazi zuen bere borrokaldia Joao B. portugaldarraren aurka. Gainera, Fexmack klubeko Ilias Rebroub, Jasmina Rebroub eta Yeray Escabiasek Euskadiko federazioko garaikurrak jaso zituzten, bakoitzak bere mailan.