Gerediaga elkarteak 2022an jarri zuen martxan Durangaldeko Ikerlari Gazteen Saria. Bosgarren deialdi honetan, 2026ko ekainaren 14rako aurkeztu beharko dituzte lanak. 1.500 euroko saria irabazteaz gainera; Astola aldizkarian ikerketa lanaren laburpena argitaratzeko aukera emango zaio irabazleari. Ikerketa gaiak edota arloak Durangaldean kokatutakoa izan behar da, eta artikulu, poster akademiko, ikus-entzunezko edo podcast formatuan entregatu ahalko dituzte. Bakarkako lana edo taldekakoa ere izan ahalko da, baina eskatzaileak Durangaldean bizi edo ikasi beharko du. Lanak gerediaga@gerediaga.eus helbide elektronikora bidali beharko dituzte eskatzaileek.
Iaz, Pello Zabarte zaldibartarrak jaso zuen saria 'Bitor Garitaonandia. Euskal Pizkundean dagokion lekuaren bila' lanagatik. Hauek dira aurreko deialdietako irabazleak: Lehenengo edizioan, Peio Martin (Zornotza), Ibone Gomez (Zaldibar) eta Adrian Burgada (Durango) jaso zuten beka; bigarren edizioan Jokin Camarerok (Durango) eta Xixili Bengoetxeak (Otxandio) jaso zuten; hirugarren edizioan Marta Calvok (Durango) jaso zuen "Abadiñoko Nuestra Señora de Begoña barnetegia frankismoaren ongintza sistemaren hastapenetan" lanagatik.