Izugarria egin dute gaur goizean Durangaldeko korrikalariek Gorbeia Suzien lasterketan. Skyrunner World Series zirkuituko proban Aitor Ajuria otxandiarrak nagusitasunez irabaztea lortu du. Otxandioko korrikalaria probaren hasieratik lasterketa buruan jarri da eta nagusitasunez irabaztea lortu du. "Siñistu ezinik nago. Hasieratik aurrean joatea gura nuen, banekien hor egon behar nuela, eta beheranzkoan benekien beste puntu bat nuela eta aurrera egitea erabaki dut. Negar batean sartu naiz helmugan, nire izena toki guztietatik entzun dut, oso maitatua sentitu naiz. Lasterketa hau Kepa Larreari eskeintzen diot, hau berea da", esan du Ajuriak lasterketa amaitzeaz bat.
Lasterketa itzela egin duena ere Gontzal Murgoitio elorriarra izan da. Murgoitiok atzetik aurrerako lasterketa egin du eta Gorbeia Suzien lasterketako podiumean sartzea lortu du.