Gerediaga elkarteak eta Urkiola Landa Garapenak bisita gidatuak antolatu dituzte eskualdeko historia eta ondare materiala zein immateriala ezagutarazteko. Gaur aurkeztu dute katalogoa, Garain egindako prentsaurrekoan. Egitasmoaren bultzatzaileek azaldu dutenez, 25-30 laguneko taldeei eskainitako txangoak izango dira, ekainaren 22tik irailaren 28ra Durangaldeko 11 herritan egingo direnak. Era berean, bisitek landa eremuko turismo jasangarria bultzatzea ere badutela helburu esan dute.
Berbaldi ibiltariok euskara hutsez emango dituzte eta doakoak izango dira. Interesdunek aurretiaz eman beharko dute izena txangoetan, eta antolatzaileen baieztapena jaso. Horretarako, Gerediaga elkarteagaz hartu-emanetan jarri beharko dute, 94 681 80 66 telefonora deituta edo gerediaga@gerediaga.eus helbide elektronikora mezua bidalita. Bisita gidatuen katalogo osoa gerediaga.eus atarian kontsultatu daiteke. Ibilbiderik gehienak "irisgarriak eta edonork egiteko modukoak" dira, baina euretariko batzuk luzeagoak eta aldapatsuagoak dira; Urkiolako Natur Parkeko inguruetan antolaturikoak, adibidez. Horietarako, mendiko oinetakoak jantzita eramatea gomendatu dute Gerediagak eta Urkiola Landa Garapenak, "bidea aldapatsua delako leku batzuetan".
Herririk herri
Bisita gidatuen lehenengo abiapuntua Durango izango da. Ekainaren 22an Erdi Aroko hiribildua ezagutzeko aukera eskainiko dute, 11:00etan. Ekainaren 28an Abadiñora egingo dute txangoa, Urkiolako Parke Naturalera, eta ekainaren 29an Mañariko aldatsak igoko dituzte. Uztailean Zornotzako bazterrak, Elorrioko jauregiak eta Zaldibarko garai bateko bainuetxearen historia ezagutzeko txanda izango da. Irailean Izurtza, Iurreta, Berriz, Atxondo eta Garai aldean eskainiko dituzte bisita gidatuak. Egitarauaren xehetasun guztiak anboto.org atarietan ere topatu daitezke.