Nafarroako Lakuntza-Aralar mendi lasterketak 20 urte bete zituen atzo eta 26 kilometroko lasterketan (1200 m+) Durangaldeko korrikalariak izan ziren protagonista. Emakumeetan Garazi Sampedro atxondarrak irabazi zuen (2:38:10) eta gizonetan Ander Jauregi durangarrak (2:09:24). Eskualdekoen lorpenak ez ziren hor geratu: emakumeetan bigarren izan zen Leire Uribe, laugarren Oihane Unzalu eta zazpigarren Nora Narbaiza.
Lasterketa Euskal Herria Koparen barruko hirugarren proba puntuagarria izan zen. Beste bost geratzen dira aurretik: Galdames mendi bira ekainaren 7an; Baztandarrak Trail uztailaren 19an, Agoizko mendi lasterketa irailaren 14an, Sorginen Lasterketa urriaren 5ean eta Kolitza Balmatrail azaroaren 2an.
Une honetan emakumeen sailkapen nagusiko lehenengo laurak eskualdekoak dira: Oihane Unzalu lider dago 293 punturekin. Garazi Sampedro bigarrena da 290 punturekin; Leire Uribe hirugarren dago 284 punturekin eta Nora Narbaiza laugarren 236 punturekin. Gizonetan eta Master B-C kategorian Alpino Tabira mendi klubeko David Roman da liderra 315 punturekin.
Garazi Sampedro eta Leire Uribe berbetan, mendi lasterketako helmugan.