12:00etan ekitaldi politikoak egingo dituzte aipaturiko puntu eta tontor guztietan, eta adarra joko dute aldi berean, ekainaren 7an Bilbora joatera deitzeko. Durangaldeko herritarrei dagokienez, Oizera igotzera deitu du Gure Eskuk. Ibiltarientzako hitzordua honako hau da: 10:00etan irtengo dira, Undakortatik (Garai). Oizeko tontorreraino elkarregaz igoko dira, oinez.
Batzar Nagusiek, ekainaren 8an
Era berean, urteetako ohiturari eutsita, Bizkaiko Batzar Nagusiek ere hurrengo domekan, ekainak 8, deiadar mendietara igotzera deitu dute. Kasu horretan ere, Durangaldeko ibiltariek Oizera igotzeko aukera izango dute, Durangoko Alpino mendi taldeko kideekin batera. Hitzordua Garaiko plazan egin dute, 09:00etan. Handik irtengo dira Oizera, oinez. 12:00etan adarra joko dute tontorrean, batzar nagusietara deitzeko.