Hirugarrenez antolatu dute argazki lehiaketa, eta aurtengo edizioak ere gizarte-erantzunkizuna sustatzea eta bide-ezbeharren inguruko kontzientziazioa lantzea izango du helburu. Parte hartzaileek garbiagoak eta eraginkorragoak diren garraiobideen aldaketa islatu beharko dute argazkietan. "Azken batean, mugikortasun seguru eta iraunkorra bultzatzen duten argazkiak eta hiri gizatiarragoak sortzea" da helburua, "espazio publikoa modu atseginagoan" partekatu ahal izateko, adierazi du Stop Bide Indarkeria elkarteak.
Lehiaketan parte hartu gura duten herritarrek maiatzaren 11ra arteko epea izango dute argazkiak stopbideindarkeria@stopviolenciavial.eus helbidera bidaltzeko. Egileak bere datuak zehaztu beharko ditu: izena, bi abizen, helbidea, telefonoa, helbide elektronikoa eta NAN zenbakia. Epaimahaia lehiaketan esku hartzen duten erakakundeetako ordezkariek, Stop Bide Indarkeria elkarteko ordezkari batek eta argazkilaritzan aditua den pertsona batek eratuko dute.
Sari ugari
Hiru sari egongo dira jokoan, hiru argazkirik onenentzat, hain zuzen ere: lehenengo saria 800 euroko balioa duen bizikletak eta 100 euroko garraio publikoko bonuak osatuko dute. Bigarrena, kirolerako arropa ekipatzeko 600 euroko bonuak eta garraio publikoan erabiltzeko 100 euroko bonuak. Hirugarren saria 300 euroko bidaiak eta garraio publikoan erabiltzeko 100 euroko bonuak osatuta egongo da. Gainerako finalistek 50 euroko garraio publikoko bonua jasoko dute.
Lehiaketari buruzko informazio osatua eta bete beharreko oinarri guztiak Stop Bide Indarkeria elkartearen atarian kontsultatu daitezke.