Joan zen zapatu goizean Euskaldun txapelketako hirugarren lasterketa lehiatu zuten Berriatuan. eta eskualdeko Eiser-Hirumet taldean dabilen Iñaki Trujillo getxoztarrak irabazi zuen. Astarrikan behera markatu zituen diferentziak. Euripean eta errepide bustian, arriskatu egin zuen. Ziztu bizian jaitsi zen eta orduan hartutako metroei esker irabazi zuen lasterketa. Azken metroraino izan zen emozioa, Caja Rural taldeko Iker Diazek gogor esprintatu zuelako. Azkenean, ozta-ozta bada ere, Trujillok lehen postuari eutsi zion.
Garaipen honekin sailkapen nagusiko hirugarren postuan kokatu da Trujillo, Aimar Galdos eta Diego Ruiz de Arcauteren atzetik. Euskaldun txapelketarako puntuagarria den hurrengo proba zapatu honetan izango da, Laukizen.