Iurretarrek eta Durangarrek amaitu dute Ibaizabal gaineko pasabide berria izendatzeko parte hartze prozesua. Zubi berriak honako izen hau izango du: Atxutxietako Zubia. Eta horri eskerrak, berria den azpiegiturak toponimo zaharraren izena izango du. Aukera horrek izan du iurretarren eta durangarren babesik handiena (149 boto). Parte hartze prozesuko bost aukera nagusiak honako hauek izan dira
- Atxutxietako Zubia – 149 boto
- Deabruaren zubia – 107 boto
- Zubigorri – 14 boto
- Inpernuzubi – 13 boto
- Sapuzubi – 9 boto
Durangoko eta Iurretako Udalen berbetan, zubia ez da mugikortasunerako azpiegitura bat bakarrik. Herri bien arteko loturaren sinbolo ere bada. Asier Perugorria Durangoko Udaleko Herritarren Partaidetzarako zinegotziak azaldu duenez, "zubi honek gure inguruko elementu giltzarriak definitzeko gure udalerriek elkarrekin egiten duten ahalegina adierazten du. Atxutxietako Zubiak gure historia eta nortasuna islatzen ditu, gure jendeak demokratikoki erabakita".
Zubiaren izena datozen asteetan ofizialduko dute bi udalek.