Durango zikloturisten bilgune bihurtuko da bihar goizean. Izan ere, Bibe Transbizkaia martxa Landako Gunearen parean hasiko da, 08:00etan. Amaiera berriz Urkiolako santutegian izango du, urtero lez.
Aurten seigarren aldia duen probak ibilbide bi ditu: iraupen luzekoa eta erdikoa. Iraupen luzekoak 179 kilometro ditu eta 3.500 metroko desnibel positiboa. Zortzi mendate daude ibilbidean: Kanpazar, Ixua, Milloi, Astorkigane, Sollube, Gerekiz, Muniketa eta Urkiola. Iraupen erdiko probak 122 kilometro ditu, 2.445 metroko desnibel positiboarekin.