"Joan zen asteburuko manifestazioek Osakidetza jasaten ari den desegitearen inguruko kezka gero eta handiagoa eta orokorragoa" dela iritzi dio De Madariagak. Hori dela eta, Gotzone Sagardui Osasun sailburuari eta Eusko Jaurlaritzari leporatu die "osasun-sistema zaintzeko eta babesteko borondaterik ez" izatea. "Ez dira arduratsuak izaten ari, gure osasuna jokotzat hartzen ari dira, eta gure ustez, hori larria da", diote.
Batzar Nagusietako bozeramailearen esanetan, Durangaldeko egoera "bereziki arriskutsua" da. Etengabeko Arreta Gunea "oso saturatuta" dagoela eta arratsaldeko bostetatik aurrera pediatriako larrialdi zerbitzurik ez dagoela gaineratu du. De Madariagak adierazi du "Lehen Mailako Arreta eta zerbitzuak berreskuratzeko lanean" jarraituko duela, eskualdeko osasun arreta "ona izan dadin".