"Gaur egun, eskoletako sukaldeetan ez dira gure baserritarren eta arrantzaleen produktuak sartzen. Gainera, janariaren kalitatea gero eta eskasagoa da. Gaurko legedia aplikatuz, ez digute gure bidean aurrera pausorik ematen uzten, eta Hezkuntza Lege berrian ere eskola publikoetako jangelak ahaztu dituzte". Berton Bertokoa dinamikak modu horretan definitu du Durangaldeko hainbat eskola publikoetako ikasleek bizi duten egoera. Jangela eredu berria "blokeatzen" ibiltzea leporatu diote Eusko Jaurlaritzako eta Eusko Legebiltzarreko hainbat ordezkariri, eta horri erantzuteko, hainbat agintariren helbide elektronikoa "blokeatu" dute, modu simulatuan. "Jangela eredu berria blokeatzen dutenak blokeatu ditugu", azaldu dute dinamikako kideek ohar bidez.
Eskola elikaduraren aldeko mugimenduak adierazi du ikasleen elikadura hobetu, baserritar eta arrantzaleak bultzatu, ingurumena zaindu, bertoko ekonomia bultzatu eta eskolako jangela leku hezitzaile baten bihurtu gura dutela.