Eiser -Hirumet taldeak Durangon egindako kontzentrazio batekin hasi du denboraldi berria. Aurtengo taldea hamalau txirrindularik osatuko dute. Euretako lau harrobitik igo dituzte: Mikel Arrasate Duranguesako Cafés La Tostadora Flotamet taldetik, eta Aimar Gorriñobeaskoa, Gorka Amuriza eta Galder Leiza Punta Galeako Loiumat taldetik. "Taldeko txirrindularien %60 klub bietako harrobitik datoz eta horrek azken urteetan harrobian egin den lana indartu egiten du", adierazi dute klubeko kideek ohar batean.
Harrobikoez gainera, beste txirrindulari berri bi daude taldean: Eolo Kometa taldetik datorren Lucas Guillermo eta Laboral Kutxa taldetik datorren Jon Arakama. Gainerako zortzi ziklistek iaztik jarraitzen dute: Oier Muñiz, Eneko Apodaka, Iñaki Trujillo, Lander Hernandez, Eder Moreno, Adam Bent, Alex Ashman eta Ben Houlihan. Denek Orbeako Orca M20i markako bizikletak erabiliko dituzte.
Babesleei dagokionez, iazkoei eusten diete: Eiser, Hirumet, Getxoko Udala, Grupo Dromedario, Construcciones Lasuen, Ekidom, Egoin, Suministros Mugarra, Bio Racer eta Durango Turismoa.