Bizkaiko Batzar Nagusiek ibilgailu astunei bidesaria ipintzea onartu berri dute. Neurria 2023an sartuko da indarrean eta herrialdeko bost errepideri eragingo die. Horren aurrean, garraiolariek eta bidesarien kontrako plataformek protesta egin dute. AP-8 Peajerik ez, AP-68 Dohainik eta A-636 Peajerik ez plataformek ohar bateratu bat kaleratu dute haien kritika azaltzeko. Diotenez, bidesari berriak kamioientzat izango dira "hasiera batean", baina "ziur aski ibilgailu arin guztietara zabalduko dira, Gipuzkoako A-636 errepidearekin gertatu den bezala". Plataformen iritziz, neurriak "ordainbideak erabiltzera behartzen duen estrategia bati erantzuten dio", erregaien zerga "foru-kutxetarako diru-iturri nagusia izatera" igarota.
Kritikak politikariei
Bidesarien kontrako plataformek diotenez, Imanol Pradales Azpiegituren foru diputatua "gezurretan" dabil, bidesaria ipintzea "Europako zuzentarauaren eskakizunak betetzeko" dela dioenean. "Gezurretan ari da, eta oker dagoela jakinda egiten du, Europako Batzordeak ez baitu estatu kiderik behartzen bidesariak ezartzera", azaldu du plataformak.
Bestalde, plataformek oposizian dauden alderdien "gaitasun eza" kritikatu dute. "EH Bilduko eta Ahal Duguko batzarkideen jarrerak agerian uzten du gai honetan beharrezkoak diren kolaborazionistak direla, eta ez dutela alde handirik EAJ eta PSE-EEren konpartsarekin", adierazi dute oharrean.