ANBOTOK 20 URTE

"Hiru ikuspegi"

Maria Gorosarri Gonzalez (EHUko irakaslea)

Durangaldean Anbotok daukan lekuaren berri irakurle kopuruak ematen du. Nik Anbotori hiru ikuspegitatik begiratu diot. Lehenengo, kazetari moduan ibili nintzenean, proiektua martxan ipini eta gutxira. Euskaldunon Egunkarian egon nintzen lehenago, baina han albiste-agentzien teletipoen eta prentsaurrekoen agendapean lan egin behar izaten genuen. Anboton, ordea, albisteak geuk sortu behar genituen eta, horretarako, herririk herriko iturriak bilatu behar izaten genituen. Informatzaile anonimo horiei guztiei ganoraz eskerrak emateko leku egokia izan daiteke hau. Eta, goraintziekin gaudela, ezin ahaztu orduko lantaldea eta elkarrekin emandako ordu luzeetan egindako barre-algarak.

Bigarrenik, EHUko ikertzaile moduan, Anboto aztertzeko aukera eduki dut. Asko pozten nau Anbotok berdintasunarekiko daukan konpromisoak: eskualdeko andreek lortu dituzten ikusgaitasuna eta babesa azpimarratzekoak dira; kirolariek, batez ere. Gainera, informazioa nork zabaldu duen zehazten dute Anbotoko albisteen ia erdiek. Ez da gauza bera esatea herri bateko udalak diru-laguntza batzuk emango dituela edo udal horrek deitu duela iragartzeko diru-laguntzak emango dituela. Albistearen jatorria aipatuta, informazioaren interesa agerian geratzen da.

Azkenik, irakurle moduan ere jarraitzen dut Anboto, aspaldian ez naizelako eskualdean bizi. Berlinen bizi izan naizenean ere, eskertu dut sarean anboto.org kontsultatu ahal izana. Are gehiago, etxealdiaren sasoian, koronabirusaren jarraipenaren berri eduki ahal izana.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!