ANBOTOK 20 URTE

"Astekaritik gogokoen dudana gertukoen proiektu eta afizioen berri jakitea da"

Aritz Lasarguren Otzerinjauregi (Kriskitin)

Ustekabean doaz urteak aurrera eta abiada berean aldatzen doa bizitza, baita gure bizitzeko era ere. Mundu globalizatu honetan askotan galdu egiten gara, lurrindu, desagertu, gertukoaz baino urrutikoaz gehiago dakigun garai hauetan. Inoiz baino gehiago beharrezko dugu gure gertukoen berri jakitea, gure auzotan gertatzen ari denaz, gure herritarren nondik norakoez eta gure komunitatean ditugun kezka zein desioez.

Ohartu orduko 20 urte igaro dira Anbotok Eraz aldizkariari lekukoa hartu eta lehen alea plazaratu zuenetik. Paperean hasieran, digitalki ere ondoren, esan dezaket kontziente naizenetik izan dudala Anboto astekaria bidelagun. Gertuko informazioa Euskaraz eskainiz, inguruko albisteen berri emanez, herrikideen proiektu zein ekintzei zabalkundea emanez, Anboto komunitatearen bitartez herritarren ahotsa bermatuz… eta, batez ere, 20 urtez Euskara erdigunean jarriz, gure ingurua eta ingurukoak ezagutzera emanez, txikitik eta txikitasunetik eraginez.

Astekaritik gogokoen dudana gertukoen proiektu eta afizioen berri jakitea da. Are gehiago, kultur proiektu edo sorkuntzen inguruko informazioa denean. Anbotori esker izan dut inguruko artista eta sortzaile askoren berri, haien proiektu, ideia eta ekitaldien inguruan. Gertukoak izan arren, askotan nekez ezagutzen dugu elkar, eta Anbotok bide luzea darama zerbait kontatzeko duen orori boza ematen.

Euskaraz, gertutasunez, mimoz eta profesionaltasunez bidea egiten jarrai dezazula.

Urte askotarako! Biba Anboto!

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.