Durangaldeko Ikasleen Autodefentsarako Sareak manifestazioa egingo du bihar. Ikasle antolakundeak adierazi du pandemiaren aitzakipean areagotu egin direla ikasleen kontrako jarrera "autoritarioak". "Ikasgeletan osasun bermerik ez dugun bitartean, hezkuntzaren kalitateak nabarmen egin du behera", salatu du antolakundeak. "Honi oinarrizko eskubideen urraketa eta autoritarismoaren gorakada gehitu behar zaizkio. Covid19a aitzakiatzat erabili da ikastetxeetan modu arbitrarioan hartutako erabakiak eta jarrera despotikoak justifikatzeko", esan dute ohar bidez.
Martxa Iurretako Juan Orobiogoitia institututik abiatuko da 12:20etan, eta Durangoko Santa Anan amaituko da, bidean, Fray Juan Zumarraga institututik pasatuta.