Mankomunitateak iaz eskainitako Gizarte Larrialdietarako Laguntzen diagnosia egin du. Honako datu hauek jakinarazi ditu. Iaz, 827.547 euro bideratu zituen herritarren oinarrizko beharrizanak asetzera, duela bi urte baino %5,58 gehiago, eta etxebizitza errenta ordaintzera bideratu zituen horien guztien %38, hau da, 316.838 euro inguru.
Partidei dagokienez, honela banatu ziren gainontzeko Gizarte Larrialdietarako Laguntzak: %19,30 energia zerbitzuak ordaintzeko erabili ziren (duela bi urte baino %3,30 gutxiago); %15,53 etxebizitzaren mantentze lanetarako (-%0,71); %12,31 kredituak amortizatzeko (-%3,31); %2,52 konponketak eta instalazioak egiteko (+%49,35), eta %1,33 altzariak eta etxetresna elektrikoak erosteko.
Mankomunitateko iturriek adierazi dutenez, Gizarte Larrialdietarako Laguntzekin "gizarte-eskubideak eraginkortasunez baliatzeko tresna pertsonal, sozial edo ekonomiko nahikorik ez dutenen gizarteratzea erraztu" gura dute. Eskatzaileen %63 emakumeak izan ziren. Herriz herri, honako eskari hauek egon ziren: 108 Abadiñon, 10 Atxondon, 371 Durangon, 87 Elorrion, 79 Iurretan, 1 Izurtzan, 4 Mañarian, 25 Otxandion eta 62 Zaldibarren.