Aldizkari digitalak egiten ikasten ari dira Nafarroako ikasleak ZUT aldizkariaren laguntzarekin

Zazpi ikastetxetako DBHko ikasleak euskal kulturaren ezagutza lantzen ari dira Sormen digitala izeneko irakasgaian. Ikasleek, ZUT aldizkaria eredu hartuta, aldizkari digitalak sortuko dituzte ikastetxeetan. ANBOTO kide den Aldizkari Digital Multimediak gidatzen ari da ikastetxeetako saioak.

Nafarroako D ereduko zazpi ikastetxetako ikasleek aldizkari digital bat nola egin ikasiko dute ‘Sormen digitala’ irakasgaiaren jarduera osagarrien barruan. Ikasgai horren bitartez DBH-ko 2. eta 3. mailako ikasleek esperimentazioaren bitartez euskal ondarea ezagutuko dute. Ikasleek ZUT aldizkari digitala izango dute eredu eta ZUTeko lantaldeak gidatuko du ikastaroa. ANBOTO, ZUT aldizkaria kaleratzen duen ADMko (Aldizkari Digital Multimediak) kide da.

2020-2021 ikasturtean landuko den irakasgai berria Barañaingo Alaitz, Altsasuko eta Lekarozeko institutuetan, zein Iruñeko Jaso Ikastola, Eunate, Iparralde eta Iturramako ikastetxetan garatuko da.

Hezkuntza Departamentuaren Euskara Atalak diseinatutako Sormen digitala irakasgaiaren baitan aste honetan gauzatzen ari den ikastaroan gazteei gidoiak nola egin; plano orokorrak, amerikarrak eta plano motzak nola tartekatu; leku argietan eta leku ilunetan nola grabatu; grabazioetan soinua eta musika nola txertatu eta mugikorrarekin grabatzeko programak nola erabili irakatsiko zaie.

Horretarako, EIBZko irakasleek lau tailer diseinatu dituzte –Ezpainzapiak, Handia eta Maskarak, Frontoia eta Txalaparta-, proposamen sortzaileez betetako unitate didaktikoak. Unitate hauen bidez, sortze askea bultzatu nahi da: dantzaren, musikaren, antzerkiaren edota arte plastikoen bidez irudikatzea tailerretan ikusi eta ikasitakoak eragindako sentipen, gogoeta eta sentimenduak, eta irudikapen horiek bideoan bildu eta aldizkari digital batera igotzea gero. 

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.