Babeserako maskarak gehienez 4 orduz erabili daitezke, eta zikintzen, hezetzen edo aurpegiaren gainean behar bezala jarri ezin diren bakoitzean, garbitu egin beharko dira. Horrela azaldu dute Mankomunitateko arduradunek.
Gainontzekoei gaixotasunak ez kutsatzea da maskara berrerabilgarri horien funtzioa; hauts-mikropartikulak uxatzea eta infekzio-arriskuak ahalik eta gehien murriztea, zehaztu dutenez. "Ehun hipo-alergenikoz eginda daude, eta horrek larruazalarekin kontaktua izatearen ondoriozko erreakzio alergikoak saihesten ditu eta hezetasuna kanpora ateratzen duen teknologia berritzailea erabiltzen du. Pertsonaren erosotasuna errazteko diseinatuta daude, eta %100ean birzikla daitezke",gaineratu dutenez.
Honako elkarte hauetan banatu ditu maskara Mankomunitateak: San Trokaz eta San Prudentzio (Abadiño), Anbotoko Dama (Atxondo), Berrio-Otxoa eta La Esperanza (Elorrio), Goiuriko Ama (Iurreta) Ursula Donea (Mañaria), San Migel (Garai), Pasealeku (Otxandio), San Martin (Zaldibar), Erdoitza (Izurtza) eta Bizidun elkartea (Durangaldea).
Nagusien Etxeak zabaltzeko protokoloa
Bestalde, Nagusien Etxeak berriro Irekitzeko eta Berraktibatzeko Protokoloa idatzi dute Mankomunitateko Adinekoen Zerbitzuan, Covid-19aren agerraldi berriak saihesteko prebentzio arauak kontutan hartuz. Osakidetzaren arauak jarraituz egin den proposamen hori Udaletara bidali da, "zentro horiek irekitzeko orduan erabakiak hartzen laguntzeko tresna gisa", azaldu dutenez.