Astelehenean Bizkaiko Aldundiaren egoitza aurrean eta hainbat herritan elkartuko dira protesta egiteko. Durangon, 11:00etarako egin dute deialdia, udaletxe aurreko plazan.
Koronabirusak aurretik existitzen zen arazoa areagotu egin duela uste du Bizkaiko Pentsionisten Mugimenduak. "Pandemiak bere gordintasun osoa azaleratu baino ez du egin, duela bi hilabeterarte ezkutuan zegoena. Iragarritako drama baten kronika da", salatu dute ohar batean. Bizkaiko Foru Aldundiaren menpeko zentroak ez ezik, pribatu eta itunpekoak ere gogoratu dituzte. "Ezin dugu alde batera utzi, Zahar-Egoitza pribatuen zein itunpekoen jabe edo kudeatzaile diren patronalen erantzukizunaren larritasuna", azpimarratu dute.
Arloko profesionalei babesa
Sektorean izan diren murrizketak salatu eta bertan lan egiten duten profesionalen lana defendatu dute. "Lan-baldintza egokiak eskatzen ditugu, beren lana duintasunez eta profesionaltasunez egin ahal izan dezaten".