ELAko langileei ez zaie nahikoa iruditu patronalaren proposamena eta akordiorik ez sinatzea erabaki dute. Sindikatuaren iritziz, lan-hitzarmena berritzeko proposamenak ez ditu "sektorearentzat funtsezkoak diren aldarrikapen batzuk jasotzen" eta hobekuntzak egiteko tartea dago. Ondorioz, greba deialdiagaz aurrera jarraituko dute. Kaltetuak izan daitezkeen erabiltzaileei "elkartasunez" jokatzeko deia egin diete.
LAB, CCOO eta UGT sindikatuek, aldiz, ez dute erabaki ea akordioa sinatuko duten ala errefusatuko duten. Langileak patronalaren proposamena aztertzen ari dira, eta erabaki bat hartu bitartean, lanuzteak bertan behera utzi dituzte. LAB sindikatuko iturriek ANBOTOri azaldu diotenez, "kiroldegiz kiroldegi" ari dira langileekin batera bozketak egiten.
ELAk du giltza
ELA sindikatuaren jarrera giltzarria da patronalaren eta sindikatuen arteko negoziazioetan. Kontuan hartu behar da balizko akordio batek izaera orokorra hartuko duela, baldin eta langileen erdiak baino gehiagok babesten badute patronalaren proposamena. ELAk, Bizkaiko kiroldegietako langileen %51 baino gehiago ordezkatzen ditu eta, horrenbestez, berak du negozioazioen pultsua markatzeko giltza. LAB, CCOO eta UGT sindikatuek akordioa sinatu dezakete, baina langileen erdia ordezkatzera ailegatzen ez direnez, izaera mugatua edukiko luke akordioak.