Zuazubiskar laugarren eta Gorostiza seigarren pistako Espainiako txapelketan

Ezkerretik hasita: Aroa Gorostiza, Markel Rodriguez, Illart Zuazubiskar, Ziortza Isasi eta Miren Mairu Uriarte.

Asteburuan Mallorkan jokatu den Espainiako Txapelketan eskualdeko bost txirrindulari egon dira: bi abadiñar eta hiru elorriar.

Zapatuan Espainiako Omnium txapelketa jokatu zen Mallorkan. Bertan, posturik onena Illart Zuazubiskarrek lortu zuen. Abadiñarra laugarren izan zen.  “Gauzak gura moduan irten ez arren, gustora nago zapatuko laugarren postuagaz”, esan du Zuazubiskarrek. Markel Rodriguez herrikideak ez zuen lortu proban sailkatzea.
 
Emakumeetan, Aroa Gorostiza elorriarra seigarren geratu zen eta Ziortza Isasi elorriarra hamargarren. “Nire helburua taldekideei laguntzea zen, eta egindako lanagaz oso pozik nago, Usabiaga ahizpek lehenengo eta bigarren postuak lortu zituztelako”, adierazi du Isasik.  Gazte mailan, berriz, Miren Mairu Uriarte elorriarra 21. postuan sailkatu zen.
 
Zuazubiskar Munduko Kopara
Abadiñarrak Mallorkatik Kanadara bidaiatu du. Datorren asteburuan Kanadan jokatuko den Munduko Kopan parte hartuko du Zuazubiskarrek.
Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.