Irene Reinak bolada baterako bakarrik esan zion agur bere sorlekuari, 2009an. Umezain modura hilabete batzuk lanean egiteko, eta, bide batez, frantsesa ikasten segitzeko asmoz joan zen Suitzara, Yverdon-Les-Bains hirira. Baina, gerora, beste lan batzuk aurkitu, bizimodua han eraiki eta bertara ezkondu zen. Simon Baechler suitzarragaz ezkondu zenean, haren abizena hartu eta Irene Reina Irene Baechler da harrezkero. Ume bi dituzte, Alex eta Ariane, eta hirugarren bat itxaroten dabiltza. Otsailean jaioko da familiako kiderik gazteena.
Ardo beroa eta eskia
"Hemen, Gabonetako merkatuetara eta eskiatzera joateko ohitura handia dago. Edarien artean, ardo beroa hartzen dute. Ardoa hainbat espeziegaz ondu eta berotzen dute. Arrakasta handia du hemengoen artean", dio Irenek. "Gabonetako otorduei dagokienez, bai Gabon gaua eta bai Gabon eguna Euskal Herrian ospatzen den antzera egiten da: familia giroan afalduta eta bazkalduta. Gabon zahar gauari dagokionez, baina, desberdina da. Urtezahar egunean eta urteberri egunean familiek ez dute elkartzeko ohiturarik. Parrandarako, lagun artean egoteko edo bikotekideagaz egoteko gaua izaten da", gaineratu du.