"Floridan (AEB), Gabonetan, jatekoari ez diote Euskal Herrian besteko garrantzirik ematen. Elkarri opariak egitea da amerikarren gauzarik inportanteena. Diru asko gastatzen dute horretan. Guk, ostera, diru gehiago gastatzen dugu janaritan eta edaritan", dio Juan Luis Aperribaik (Iurreta, 1965). Sorterritik urrun hainbat urtean bizi diren arren, Aperribaik eta Eva Plaza bikotekideak (Durango, 1967) osatutako familiak ez ditu etxeko ohiturak galdu. 1983an, lan kontuengatik Durangaldetik AEBetara joatea erabaki zuen bikoteak, eta han finkatu dira harrezkero. "Puntista nintzen. Zesta-puntan nenbilen, eta horrek ekarri gintuen hona", azaldu du Aperribaik. Urteek aurrera egin ahala, familia handitu dute. 1993an Iker jaio zen, eta 1996an, Gorka.
Karta-jokoa eta itsaskia
"Hemen inportanteagoa da abenduaren 25a, gabon gaua baino. Esker emate egunean egiten duten antzera, indioilarra jateko ohitura handia dute", dio Aperribaik. "Guretzat, baina, garrantzi handiagoa du Gabon gauak. Familiako kideak eta lagunen bat edo beste elkartzen gara. Kartetan egiten dugu. Berandu samar afaltzeko ohitura dugu eta, normalean, arraina edo itsaskia prestatzen dugu. Badira urte batzuk karakolak kozinatzen ez ditugula. Miamira joanez gero, lortzen dira, Gutarra markakoak".
Opariei dagokienez, Aperribaik dio Bizargorri dela hango etxeetara opariak eramaten dituena, baina euren etxetik Olentzero eta Mari Domingi pasatzen dira, antza.
