Klima aldaketaren aurrean, ekintza zuzen bat egitea proposatu dute bideoan. "Zuhaitzak landatzea, zuhaitz asko" behar direla diote. Erronka modura "100 pertsonak, 100 zuhaitz hazi" landatzea proposatzen dute, "Gernikatik, Durangotik eta Zornotzatik" 15 minututara dagoen eremu batean. Hain zuzen, Muxikako Ibarruri auzoan Bizkaiko baso autoktonorik handiena sortu gura du Lurgaia fundazioak, eta haregaz harremanetan ipintzeko deia egin dute. Fundazioak txangoak antolatu ohi ditu, boluntarioek, bertan zuhaitz haziak landatu ditzaten.
Eukeni Bastida iurretarraren ideia izan da bideoa egitea. "Parte hartu izan dut Lurgaiaren egitasmoetan. Zuhaitzak landatzen aritu naiz. Oso jende interesgarria dira, oso naturzaleak", azaldu du. Basoa sortzen lagundu gura dutenek Lurgaia fundazioagaz ipini beharko dute harremanetan, 946576110 telefonoan, edo info@lurgaia.org helbidera idatzita.