Erronka ez da nolanahikoa. Lau etapatan banatuta, 150 kilometro egin beharko dituzte Pirinioetako Bielsa herritik abiatuko den ibilbide gorabeheratsuan. Guztira, 5.800 metroko desnibel positiboari aurre egingo diote. Espezialitate horretan dauden munduko ziklistarik onenetarikoak batuko dira bertan.
Mendizabalek eta Garatek bigarrenez parte hartuko dute proba horretan. Ibarretxerentzat eta Lebeitirentzat, ostera, estreinaldia izango da. "Badakit oso gogorra egingo zaidana. Igo beharreko desnibela itzela da. Baina, tira, proba amaitzea lorpen handia izango da niretzat. Amaitzea eta ondo pasatzea dira helburuak", dio Lebeitik.
Aurreko esperientzia
Iurretarrak badaki antzerako probetan sufritzea zer den. Apirilean, Jon Juaristi abadiñarra eta biak EpicEnduro proban aritu ziren, Europako enduro lasterketarik gogorrenean. Orduan, Montepellier-etik irtenda, 16 ordu eman zituzten bizikletatik jaitsi barik, 5.000 metroko desnibel positiboa zuen ibilbidean. "Esperientzia hori baliagarria izango zait aurretik dugun abenturari begira", uste du ziklista iurretarrak.