Rio de Oro elkarteak eskualdeko elikagai bilketa antolatu du, eta Elorrion Lajwad elkarteak sustatu du. Aurten 14 tona janari batu dira Durangaldean, iaz baino 8 gehiago. Rio de Oroko Mikel del Arcok igoera hori nabarmendu du, eta uste du Durangaldeak Saharar herriarekiko duen elkartasuna erakusten duela. “Beste behin ere, Durangaldea solidarioa da sahararrekin”. Laguntza humanitarioaren beharraren oinarrian gatazka politikoa dagoela gogoratu du Mikel del Arcok.
Instituzioek emandako diru-laguntzagaz (32.700 euro) 13 tona elikagai erosi dituzte, eta herritarren artean batutako guztia ez da kamioian sartzen. Guztira 24 tona janari bidaliko dituzte, eta sobera geratu den zati bat JAED ongintza elkarteari emango diote. Beste zati bat eta arropa euskal karabanako beste kamioi baten eramango dituzte. Alejok gidatuko duen kamioian konpresak ere sartu dituzte.
Produktuen zatietako bat ospitale baterako izango da, eta beste bat minek kaltetutako pertsonen zentrorako. Bestalde, Durangaldeko pertsona anonimo batek odol analisiak egiteko makina bat dohaintzan eman izana eskertu du Mikel del Arcok.